Camp.am

ՔՆԱՊԱՐԿԵՐ

Քնապարկը` ուսապարկի, հարմարավետ արշավային կոշիկների հետ միասին դասվում է այն իրերի շարքին, որոնցից կախված է բնության գրկում Ձեր հանգստի որակը: Այն նաև մեր անվտանգությունն է ապահովում: Արշավային հագուստի հետ միասին քնապարկը թույլ չի տալիս զբոսաշրջիկի օրգանիզմի գերսառեցում, և հակառակը, թույլ է տալիս դժվար արշավային օրից հետո լիարժեքորեն հանգստանալ և վերականգնվել:

Բարդ եղանակային պայմաններում ընթացող երկարատև արշավներում, մեծ նշանակություն է ձեռք բերում քնապարկի ճիշտ ընտրությունը: Ժամանակակից տեխնոլոգիաների զարգացումը նպաստել է շատ հարմար արշավային հանդերձանքների ստեղծմանը, որը գործնականորեն թույլ է տալիս նույնիսկ ոչ փորձառու և կոփված զբոսաշրջիկին տարվա ցանկացած եղանակին ուղևորվել ճանապարհորդության: Քնապարկերը այստեղ նույնպես բացառություն չեն: 

ՔՆԱՊԱՐԿԵՐԻ ՍՏԵՂԾՄԱՆ ՊԱՏՄՈՒԹՅՈՒՆԸ

Քնապարկերը մարդիկ սկսել են կիրառել շատ վաղուց, հատկապես տարվա ցուրտ ժամանակ կամ Հյուսիսում բնակվողները: Բավականին երկար ժամանակ բոլոր քնապարկերը պատրաստվել են բնական նյութերից՝ նուրբ բրեզենտ, մորթի, բուրդ, վատինա: Այդ արտադրանքները ճիշտ է եղել են տաք, սակայն ծայրաստիճան ծանր և դժվարաշարժ: Ժամանակի ընթացքում բևեռային ճանապարհորդները որպես ջերմացնող միջոց սկսել են կիրառել նրբափետուրը, ինչը բավականին նվազեցրել է քնապարկի ընդհանուր քաշը, սակայն, բամբակե և կանեփաթելի կտորների կիրառումը և հուսալի կայծակ-ճարմանդի բացակայությունը այն կատարելագործելու համար առիթ է հանդիսացել:

Այլ հայտնագործությունների հետ համատեղ հենց քնապարկերը, խիզախ ճանապարհորդներին և զբոսաշրջիկներին օգնեցին կատարել հիասքանչ արշավներ և նույնիսկ աշխարհագրական բացահայտումներ:
Ժամանակակից սինթետիկ նյութերի ի հայտ գալը և բնական բաղադրիչների հետ նրանց համադրման հնարավորությունը, քնապարկերի շուկայում առաջացրեցին հեղափոխություն: Արդեն վաղուց գոյություն ունեն տարբեր կառուցվածքի քնապարկեր, տարբեր ճաշակի մարդկանց համար և տարբեր արժեքների, ինչն էլ թույլ է տալիս ընտրել հարմար տարբերակներ: 

ԸՆՏՐՈՒԹՅԱՆ ՀԻՄՆԱԿԱՆ ՉԱՓԱՆԻՇՆԵՐԸ

Քնապարկերի տեսակները: Աշխարհագրությունը: Կառուցվածքը 

ՔՆԱՊԱՐԿ – ԾԱԾԿՈՑ

Առավել բազմաֆունկցիոնալ կառուցվածք: Երկար կայծակ-ճարմանդը թույլ է տալիս /կամ մի քանի կայծակ-ճարմանդների կիրառմամբ/ ամբողջությամբ բացել քնապարկը, այն ձևափոխելով մեծ և հարմարավետ ծածկոցի: Նմանատիպ քնապարկերն ունեն պարզ ուղղանկյունձև կառուցվածք, բայց հանդիպում են նաև բարդ մոդելներ /և պրակտիկ/, որոնք կոնաձև են և դեպի ոտքերը ձգվող մասում նեղանում են:

Ընդունված է համարել, որ նման կառուցվածքը առավել հարմար է սովորական զբոսաշրջության, հանգստյան օրերին արշավների և տաք պայմաների ժամանակ: Դա առաջին հերթին պայմանավորված է նրանով, որ մեծամասամբ առևտրի սրահներում առկա տարբերակները պատրաստված են նմանատիպ սխեմայով: Անհրաժեշտ է նշել, որ հենց նման կառուցվածքով, սակայն ավելի լուրջ արտադրողների կողմից կան լրիվ այլ՝ բարձր մակարդակի առաջարկություններ: Նման քնապարկերը հաճախ կիրառվում են լուրջ> արշավներում:

Առավելությունները.
• տաք եղանակին հնարավոր է օգտագործել որպես ծածկոց երկու-երեք անձի համար,
• թրջված քնապարկը հեշտ է չորացնել, 
• տաք եղանակին, երեք անձի համար երկու քնապարկերի կիրառումը հնարավորություն է տալիս տնտեսել՝ քաշի, չափսի, միջոցների առումով, 
• տանը /ամառանոցում/ կարելի է անցկացնել վերմակասավանի մեջ և մշտապես օգտագործել,
• տաք եղանակին, շրջված վիճակում կարելի է օգտագործել որպես գորգ, մի քանի հոգով խնջույք անցկացնելու կամ արևայրուկ ստանալու համար և այլն:

Թերությունները
• մեծ քաշը,
• նվազ հուսալիությունը /կայծակ-ճարմանդի խափանումը կարող է դնել դժվարին կացության մեջ, կայծակ ճարմանդը շատ երկար է /բացի երկու կայծակ-ճարմանդ ունեցող մոդելից/ և համապատասխանաբար ավելի պակաս հուսալի է,
• կայծակ-ճարմանդի շրջանում ջերմության հավելյալ կորուստը,
• այլ նմանատիպ տեխնոլոգիապես հագեցված կառուցվածքների համեմատ այն թանկ է: 

<ԲՈԺՈԺԱՁԵՎ> ՔՆԱՊԱՐԿ

Զբոսաշրջության համար նախատեսված քնապարկերից ամենատարածված ձևն է: Բնորոշվում է <անատոմիական> ձևով, ուսերի հատվածում ավելի լայն է, քան ոտքերի շրջանում: Լավագույն մոդելներում քնապարկի ստորին հատվածը ունի ոտքերի ձև: Որպես կանոն, ունի այս կամ այն աստիճանի բարդությամբ գլխանոց և հատուկ ջերմային օձիք, որը կանխում է ջերմության կորուստը: Տարբեր մոդելների կայծակ-ճարմանդի երկարությունը տարբեր է: Որքան երկար է կայծակ-ճարմանդի երկարությունը, այնքան հարմար է օգտվելու համար` մեջը մտնելու և դուրս գալու, չորացնելու համար: Սակայն դա ծանրացնում է քնապարկը և բարձրացնում արժեքը /հատկապես` նրբափետուրը/:
Տաք եղանակին կողային հատվածում երկարությամբ տեղադրված կայծակ-ճարմանդով քնապարկը կարելի է բացել ներքևից, և որ ամենակարևորն է՝ նման երկու քնապարկերը աջ և ձախ կայծակ-ճարմանդով կարելի է միացնել միմյանց: Ընդ որում պարտադիր չէ, որ քնապարկերը լինեն միաձև: 
Կարճ կայծակ-ճարմանդով, կամ առանց դրա, քնապարկը օգտվողին չի ընձեռում նման հնարավորություն: Այս տեսակի քնապարկ ընտրում են անհատական և մինիմալիստ մարդիկ: 

Առավելությունները.
• հարմար է քնելու համար,
• ապահովում է առավելագույն տաքություն, 
• ավելորդ նյութերը և տարրերը հասցված են նվազագույնի,
• առկա է շատ մեծ ընտրություն:
Թերությունները
• պետք է ընտրել ըստ հասակի,
• կարճ-կայծակ ճարմանդովը այնքան էլ հարմարավետ չէ,
• որպես ծածկոց հարմար չէ: 

 ՔՆԱՊԱՐԿ <ՓՂԻ ՈՏՔ>

Կարճ քնապարկ է, հաճախ չունի կայծակ-ճարմանդ: Որպես կանոն, ծածկում է ոտքերը և ավարտվում է գոտկատեղում, երբեմն հասնում է մինչև թևատակերը: Նրանում հիմնականում քնում են նրբափետուրե բաճկոնով: Այս տեսակի քնապարկի հեղինակը այն լեռնագնացներն են, որոնց համար վերելքներում յուրաքանչյուր գրամը և քառակուսի սանտիմետր ծավալը նշանակություն ունի: Նմանատիպ քնապարկերում որպես թեթև և ջերմացնող միջոց հաճախ կիրառվում է նրբափետուրը: Տրամաբանությունը պարզ է և անթերի` եթե քեզ հետ վերցնում ես նրբափետուրով բաճկոն, ինչու այն չօգտագործել: Իհարկե քնապարկի նման ձևը ոչ բոլորին է հարմար: Իզուր չէ, որ այն արտադրվում է ոչ բոլոր ընկերությունների կողմից, հիմնականում նման քնապարկեր պատրաստվում են պատվերով, քանի որ բոլորի հասակը և չափսերը տարբեր են:
Եթե Ձեզ անհրաժեշտ է ուլտրակոմպակտ քնապարկ ոչ տևական էքստրիմի համար՝ մտածեք այս տարբերակի մասին: 

ԿՎԻԼՏ ՔՆԱՊԱՐԿ

Դեռևս քիչ տարածված /հատկապես մեզ մոտ/ քնապարկի տեսակ է: Առավել հայտնի է ԱՄՆ-ում: Մեր առևտրի սրահներում շատ հաճախ կարելի է հանդիպել Therm-a-rest ամերիկյան ընկերության մոդելը՝ առավել հայտնի իր թանկ գորգիկներով: Այսպես, կվիլտը դա քնապարկ է՝ ինտեգրված Ձեր գորգիկի հետ մի համակարգում: Քնապարկը գորգիկի հատվածում միևնույն է ճմրթվում է և չի տաքացնում, այդ հատվածում տաքացնում է գորգիկը: Ուրեմն, ինչի՞ համար է այդ հատվածում քնապարկը: Կվիլտ քնապարկի այդ հատվածում <անցք> կա, գորգիկը տեղավորվում է քնապարկում և հատուկ ձևով ամրացվում: Եթե Դուք գիշերը շրջվում եք հակառակ կողմ, ապա կվիլտի մեջ դուք այդ անում եք քնապարկի ներսում, այն միշտ մնում է միևնույն դիրքում: Ընդ որում, օգտվողը քնապարկ է մտնում այդ ներքևի բացվածքով, ապա ամրացնում գորգիկը և քնում: Այստեղ չկա կայծակ-ճարմանդ: Արդյունքում մենք ունենք հետևյալ առավելությունները:

• քնապարկի նվազագույն քաշ և ծավալ,
• կայծակ-ճարմանդի բացակայություն` գործնականորեն փչանալու ոչինչ չկա,
• ցածր գին,
• մոդուլային, համակարգային կառուցվածք,
• գնելով նման քնապարկ, ուզես թե չուզես ստիպված ես գնել թեթև և տաք գորգիկը:
Թերությունները
• կոճկելու հնարավորություն չունի,
• մոռացեք ցանկացած այլ սիրելի գորգիկի մասին,
• ստիպված եք գնել փչովի կամ ինքնափչովի գորգիկ՝ ոչ բոլորն են այն սիրում,
• ծայրահեղ դեպքերում նրանից արագ դուրս գալը դյուրին չի,
• ոչ բոլոր դեպքերում է հարմար ձեռքերը դուրս հանել /ոչ բոլորն են համաձայն այս կետին` սովորույթի հարց է/,
• մեր առևտրի սրահներում ոչ մեծ ընտրությունը: 

ԲԱԶՄԱՏԵՂԱՆԻ ՔՆԱՊԱՐԿԵՐ

Ներկայումս ոչ հաճախ է կիրառվում սովորական զբոսաշրջիկների կողմից: Որպես բացառություն` երկու քնապարկ կայծակ-ճարմանդով միացվում են, որտեղ կարող են քնել 2-3 մարդ: Այնուամենայնիվ, որոշ պայմաններում բազմատեղանի քնապարկերը շատ տեղին են, քանի որ ունեն հարաբերականորեն ցածր քաշ և չափս մեկ մարդու համար և թույլ են տալիս արագ տաքանալ: Շատ հաճախ նման քնապարկեր կիրառում են քարանձավախույզները ստորերկրյա ճամբարներում և դահուկորդ–զբոսաշրջիկները շատ ցածր ջերմաստիճանի երկար արշավների ժամանակ: 

ՆՅՈՒԹԵՐԸ 

Եթե քնապարկն օգտագործվում է լուրջ արշավներում, ուրեմն անհրաժեշտ են քնապարկեր, որոնց բոլոր շերտերը սինթետիկ են: Արդեն անցել են այն ժամանակները, երբ առաջարկվում էր բամբակե ներքին շերտով քնապարկ, որովհետև այն հաճելի էր մարմնի համար: Այժմ կան շատ անտիստատիկ սինթետիկ նյութեր, որոնք զգացողությամբ հետ չեն մնում բամբակից: Այն ավելի արագ է չորանում, որը շատ կարևոր է, քանի որ չոր քնապարկը անհրաժեշտ պայման է լավ քնելու համար: Եթե դուք ունեք զգայուն մաշկ, ապա կարելի է կիրառել բամբակյա սավան: Զբոսաշրջիկը մեծամասամբ քնապարկում քնում է հագուստով, ուստի նյութի շոշափելի հատկությունը մղվում է երկրորդ պլան: Քնապարկի նյութերը միաժամանակ պետք է լինեն ամուր և թեթև: Իհարկե, այդ նյութերից է կախված նրա արժեքը: Ի ուրախություն մեզ, արդեն գոյություն ունեն քնապարկեր կարելու համար կտորների լայն տեսականի, որոնք նաև շահավետ են: Այդ պատճառով հիմա հնարավոր է ձեռք բերել սինթետիկ ջերմացնող նյութերով լավ և որակյալ քնապարկեր՝ 100-150 դոլարով:
Ինչպես հանդերձանքի այլ ձևերում, քնապարկերի դեպքում ևս յուրաքանչյուր լրացուցիչ գրամի, աստիճանի, ծավալի քառակուսի սանտիմետրի համար Դուք պետք է էականորեն վճարեք: Նման վճարները պերֆեկցիոնիստների համար են, որոնք սեփական հանդերձանքի համար պատրաստ են վճարելու հսկայական գումարներ, միայն թե այն լինի ամենալավը: Շատ հաճախ այն սեփականատիրոջ ամենասիրելի հանդերձանքն է և համարյա չի լքում տիրոջ պահարանը:  

ՋԵՐՄԱՑՆՈՂ ՄԻՋՈՑ

Քնապարկերը ջերմացնող միջոցների հետ կապված շատ տարբեր կարծիքներ կան և հետաքրքիր է, թե՞ հատկապես նրբափետուրին փոխարինող, որ սինթետիկ նյութերն են ամենա-ամենան: Մեզ թվում է, այդ գործը պետք է թողնել այն մարդկանց, որոնք զբաղվելու գործ չունեն, իսկ մենք ընտրենք մեր քնապարկը և գնանք ճանապարհորդության: Միևնույն է, կատարյալ ոչինչ գտնել հնարավոր չէ: Մենք առաջարկում ենք մտածել <նրբափետուրին փոխարինող> արտահայտության շուջ: Հենց այնպես չէ, որ այդքան հաճախ են այն կիրառում, որովհետև բնությանը հաղթել հնարավոր չէ: Նրբափետուրը մինչ այժմ համարվում է ամենալավ ջերմացնող միջոցը: Այսինքն այն.

• ամենատաքն է,
• ունի սեղմման հոյակապ հատկություն /լավ սեղմվում է/,
• սեղմումից հետո հիանալի վերականգնվում է,
• երկարակյաց է/ իր հատկությունները պահպանում է երկար տարիների ընթացքում/:
Բացի այդ, նրբափետուրից քնապարկում պարզապես շատ հաճելի է քնել, թեպետ այդ զգացողությունը շատ անհատական է: Նրբափետուրը շատ չի սիրում խոնավություն և այդ պատճառով, շատ զբոսաշրջիկներ էր էլ նրան չեն սիրում: Ճիշտ է, այդ զբոսաշրջիկներից շատերը ինչպես հարկն է դրանից չեն օգտվել: Գոյություն ունեն տարբեր միջոցներ սեփական քնապարկը խոնավությունից հեռու պահելու համար: 
Լավ վրան, ֆուտ-պրինտ, գորգիկ, անհրաժեշտության դեպքում հանգստապարկ և հենց քնապարկի օգտագործման տարրական կանոնները պահպանելու կարողությունը նվազեցնում են նման ռիսկերը:
Մեր սուբյեկտիվ կարծիքը` եթե կա հնարավորություն /ֆինանսական/, մեծամասամբ որակյալ նրբափետուրե քնապարկը նախընտրելի է:
Չի թույլատրվում նրբափետուրից օգտվել.
• տաք և խոնավ կլիմայի դեպքում,
• շատ անձրևային վայրերում, բարձր խոնավություն ունեցող պայմաններում /մի քանի օրից ավելի/,
• տասը օր տևող վերելքների, արշավների, էքսպեդիցիաների դեպքում, եթե հնարավորություն չկա մշտապես չորացնելու նրբափետուրը:
Ընդ որում, նրբափետուրը իրապես պետք է լինի շատ լավը և որակով /ցավոք դա նշանակում է ` թանկ/: 
Սինթետիկ ջերմացնող միջոցներ: Դրանք շատ են, կան առավել հաճախ հանդիպողները` Micro-loft, Primaloft. Hollowfiber-1, Thermoloft-6, Quallofil, Thinsulate, PolarGuard 3D և այլն: Հաճախ արտադրողը նշում է, որ իր ջերմացնող միջոցը ամենալավն է շուկայում: Որպես կանոն դա այդպես չէ: Սովորաբար մի նյութը առավելություն ունի մեկ այլ նյութի նկատմամբ մի չափորոշիչով, մյուսը՝ այլ: Արդյունքում առաջանում է որոշակի հավասարություն: Լավ սինթեթիկ ջերմացնող նյութերի հիմնական հատկանիշները դրանք նրբաթելում սնուցող ուղիներն են, նրբաթելերի սիլիկոնացումը և դրանց փոքր տրամագիծը: Նույնպես կարևոր են սեղմումից հետո վերականգնման կարողությունը, երկարակեցությունը: Սինթետիկ նյութի հսկայական առավելությունը նրբափետուրի նկատմամբ համարվում է նրա անտարբերությունը խոնավության համեմատ, ջերմացնող միջոցը այն չի ներծծում, ու նշանակում է, որ արագ չորանում է և կարող է տաքացնել խոնավ պայմաններում: Մյուս մեծ առավելությունը դա նրա էականորեն ցածր արժեքն է: 
Սինթետիկ ջերմացնող միջոցներով քնապարկի ընտրության ժամանակ առաջարկում ենք Ձեզ կողմնորոշվել հետևյալ հիմնական բնութագրերով. 

ՔՆԱՊԱՐԿԵՐԻ ՀԻՄՆԱԿԱՆ ԲՆՈՒԹԱԳԻՐԸ

Քաշը – այստեղ ամեն ինչ պարզ է, որքան թեթև է, այնքան լավ:
Հարմարավետությունը – մտեք քնապարկի մեջ, պառկեք, պտտվեք: Այն պետք է Ձեզ հարմար լինի, քանի որ յուրաքանչյուրն ունի մարմնի անհատական և համաչափ կառուցվածք: Մտածեք, որ կողմում պետք է լինի կայծակ-ճարմանդը: Հագեք գլխանոցը: Քնապարկը պետք է լինի համապատասխան չափսի ո’չ մեծ և ո’չ փոքր:
Փաթեթի չափսերը- դարձյալ՝ որքան փոքր այնքան լավ:
Ջերմային ռեժիմը –պետք է լինի կիրառման պայմաններին համապատասխան: Ասում են, որ տաք է – ցուրտ չէ, բայց շատ տաք քնապարկը նույնպես կարող է անհարմարություն ստեղծել: Միգուցե չարժե քարշ տալ սեփական ձմեռային քնապարկը ամառային արշավի դեպքում: Այժմ քնապարկերի մեծ մասը թեստավորվում են հատուկ մեթոդներով: Ըստ թեստավորման արդյունքների քնապարկի ծածկոցի վրա զետեղվում է պատկերագիր, որը պարզաբանում է նրա ջերմային ռեժիմը: Նույնիսկ մի նայեք էքստրիմի ջերմաստիճանին, Ձեզ պետք է ուժադրություն դարձնել հարմարավետության ջերմաստիճանին: Այժմ ընդունված է առանձին նշել տղամարդկանց և կանանց համար նախատեսված ջերմաստիճանը, որպես կանոն կանայք ավելի շատ են ջերմություն սիրում: Կախված քնապարկի հարմարավետ կիրառման ջերմաստիճանից ընդունված է այն բաժանել` ամառային, կիսասեզոնային և ձմեռային: Սակայն այդ բաժանումները ծայրաստիճան պայմանական են: Ձմռանը Սիբիրում – 35 է, իսկ Մարոկկոյի լեռներում ոչ ավել -5: Ինչպես ցույց է տվել շատ զբոսաշրջիկների փորձը, առավել ունիվերսալ են համարվում այն քնապարկերը, որոնց հարմարավետության ջերմաստիճանը նախատեսված է -1 մինչև -6 ցելսիուսի համար: Նրանք շատ պայմաններում բավականաչափ տաք են, և բացի այդ թեթև են և կոմպակտ:
Կան մի քանի խորամանկություններ, որոնք կարող են ընդլայնել Ձեր քնապարկի հնարավորությունները: 

ՄԻՋԱԴԻՐ

Բացի այն, որ նրա կիրառումը թույլ է տալիս ոչ հաճախ լվանալ քնապարկը, այն բարձրացնում է հարմարավետության ջերմաստիճանը: Ֆլիսից միջադիրը ջերմաստիճանը բարձրացնում է 3-4 աստիճան: 
Տաք եղանակին միջադիրը կարելի է կիրառել որպես թեթև քնապարկ, այն շատ հարմար է:

ԲԱՑ ԳԻՇԵՐԱԿԱՑԻ ՊԱՐԿ

Շատ զբոսաշրջիկներ ոչ արժանի կերպով շրջանցում են բաց գիշերակացի պարկը: Այն պաշտպանում է քնապարկը խոնավությունից, կշռում է շատ քիչ /սկսած 200 գրամից/ և բարձրացնում է հարմարավետության ջերմաստիճանը երբեմն նույնիսկ հինգ աստիճանով: 
Բաց գիշերակացի պարկը Ձեզ կծառայի նաև առանց վրանի գիշերակացի ժամանակ: 

ՄԱՏՐՅՈՇԿԱ

Տեղադրեք Ձեր կիսասեզոնային պարկում ամառային բարակ քնապարկը և կստանաք ձմեռային տարբերակ, որն այնքան էլ հարմարավետ չէ: 

ՋԵՐՄԱԿՆԵՐ

Գոյություն ունեն շատ տարբերակներ` սկսած մարմնին կպցվող պիտակներից, մինչև մաքուր բենզինով աշխատող սարքեր: Գոյություն ունեն նաև շարժիչով աշխատող ջերմակներ: Ծայրահեղ դեպքում, տաքանալու համար պետք է ջուր տաքացնել պրիմուսի վրա, լցնել շշի մեջ և դնել քնապարկի մեջ: Այս բոլոր միջոցները կարողեն ավելացնել Ձեր քնապարկի հարմարավետության ջերմաստիճանը, եթե վերջացել են այլ միջոցները:  

ԻՆՉԻ ՎՐԱ Է ԱՆՀՐԱԺԵՇՏ ՈՒՇԱԴՐՈՒԹՅՈՒՆ ԴԱՐՁՆԵԼ 

RipStop – թելերով ամրացված <ցանցային> կտորե գործվածք՝ ինտեգրված սովորական գործվածքի մեջ: Բարձրացնում է գործվածքի ամրությունը և խոչնդոտում ծակերի առաջացմանը: Քնապարկերի համար օգտակար է, նրբափետուրից քնապարկերի համար` անհրաժեշտ: 
Օժանդակ նյութեր – քնապարկի հուսալիությունը առաջին հերթին կախված է կայծակ-ճարմանդի հուսալիությունից: Ցանկալի է ընտրել կայծակ-ճարմանդներ արտադրող հայտնի ընկերության արտադրանքը: Կայծակ-ճարմանդը պետք է լինի երկփականի, ինչը հնարավորություն կտա շոգ եղանակին օդափոխության համար քնապարկը արձակել ներքևից:
Մանր իրերի համար գրպան – քնապարկերի մեծ մասը հագեցած են <մանր իրերի> համար նախատեսված ներքին գրպանով, համոզվեք, որ Ձեր քնապարկում այն առկա է, քանի որ այն շատ հարմար է կիրառման համար:
Սահքը կանխարգելող ելուստներ – սինթետիկ քնապարկերը ունեն մեկ տհաճ հատկություն, նրանք լավ սահում են գորգիկի և վրանի հատակի վրայով: Քանի որ օթևանի վայրը ոչ միշտ է հարթ, Դուք կարող եք սահել, ինչը շատ անհարմար է: Լավ է, երբ քնապարկը ներքևում ունի չսահող ծածկույթ: Ցավոք, շատ հաճախ այն բացակայում է բյուջետային մոդելներում: <Կվիլտերը> մասնավորապես չունեն այդ թերությունից: 
Թաղանթ – որոշ քնապարկերի վերին շերտը պատրաստվում է թաղանթային գործվածքից: Այլ դեպքերում պարկի այն մասերը, որոնք մեծամասամբ ենթարկվում են խոնավության ազդեցությանը /առաջին հերթին ստորին հատվածը, ոտքերի շրջանը/ պատրաստվում է անջրաթափանց նյութից: Նման լուծումները սովորական քնապարկերի նկատմամբ ունեն առավելություն: Մասնավորապես, թաղանթին փոխարինում է գիշերակացի պարկը: Հատկապես կարևոր է բնական ջերմատաքացնող /նրբափետրե/ գործվածքի համար:
Սպեղանի- եթե ձեր նրբափետրե քնապարկի վրա առկա է անցք փակեք այն գործվածքային սպեղանիով: Այն կկանխի նրբափետուրների հոսքը: Լավ սպեղանին կծառայի մեկ սեզոն: 
Լվացք –սինթետիկ նյութով հագեցած քնապարկերը հանգիստ կարելի է լվանալ լվացքի մեքնայի՝ <սինթետիկա, խնայող լվացք> ռեժիմում, 400–ի և լավ լվացքի փոշու առկայութամբ: 
Նրբափետուրից պարկերը ցանկալի է լվանալ ոչ հաճախ, կիրառելով միջադիր: Եթե որոշել եք լվանալ, ապա ցանկալի է ձեռքով, սառը ջրում և պետք է օգտագործել հատուկ լվացքի փոշի: Եթե լվանում եք մեքենայում, ապա պարկի հետ օգտագործեք մեծ թենիսի գնդակներ: Այն կօգնի նվազեցնել նրբափետուրների գնդվելուն և կնվազեցնի չորացման ժամանակը: Չկիրառել քամելու ռեժիմը: Թույլ տվեք ջուրը ինքնահոս գնա և չորացրեք տնային ջերմաստիճանում: 
Ձեզ ցանկանում ենք կատարել լավ ընտրություն և ստանալ հաճույք Ձեր ճանապարհորդությունից: